Midis kryengritësve nën udhëheqjen e gjeneralit të rebeluar të ushtrisë së Kongos, Loren Nkunda, po luftojnë edhe mercenarët e ushtrisë së Ruandës.

Kështu, po shtohen frikësimet për përsëritjen e luftës në Kongo e cila u zhvillua prej vitit 1998 e deri në vitin 2003. Në të ishin përfshirë nëntë kombe afrikane. Angola, Zimbabveja dhe Namibia atëherë i mbështetnin forcat e Qeverisë së Kongos, derisa në anën e kryengritësve ishin Uganda, Ruanda dhe Burundi.

Luftimet e fundit në Kongo u shkallëzuan para tre muajsh midis forcave të qeverisë dhe kryengritësve që kërkojnë mbrojtjen e fisit Tutsi – nga kryengritësit Hutu, që ikën në Kongo pas gjenocidit në Ruandë në vitin 1994. Sipas Bi-Bi-Si-së i tërë rajoni i konfliktit në lindje të Kongos është shumë i pasur me miniera të diamantit dhe të bakrit.

Njëkohësisht, në Kongo në zhvillim e sipër është misioni më i madh deri më tash i OKB-së, që përfshinë 17.000 paqeruajtës, por ata tani për tani nuk kanë sukses t'i ndërpresin armiqësitë.