Kuvendi i Maqedonisë sot vazhdon debatin për rishikimin e dytë të buxhetit shtetëror për sivjet, me të cilin Universiteti Shtetëror i Tetovës përfiton 15 milionë denarë, ndërsa 5 milion të tjera fakultetet e disperzuara të këtij institucioni të arsimit të lartë.
Sipas propozimit për ndryshimin dhe plotësimin e buxhetit për vitin 2009, janë planifikuar shpenzime prej 2,43 miliardë euro dhe të ardhura prej 2,2 miliardë euro.

Defiçiti buxhetor është projektuar në 2,8 për qind, gjegjësisht në 178 milionë euro. Në ribalancin e dytë të këtij viti pritet rënie e ekonomisë për 0.6 për qind dhe shkallë e inflacionit prej 0,1 për qind.

“Ekonomia e Maqedonisë në vitin 2009 përballet me sfidat e krizës botërore ekonomike, e cila la pasoja mbi ekonominë vendore”, tha ministri i Financave, Zoran Stavreski, në arsyetimin para deputetëve.
Ai shtoi se buxheti shkurtohet për 3,2 për qind për shkak të përshtatjes së politikës fiskale të lëvizjeve të realizuara në ekonominë reale dhe për t`u ruajtur defiçiti në BPV-në e projektuar prej 2,8 për qind.

Të ardhurat, sipas rishikimit, janë më të vogla për 3,2 për qind, me ç`rast ato tatimore janë më të ulëta për 5,7 për qind, ndërsa më i madh është zvogëlimi te TVSH-ja për 6,5 për qind, te tatimi personal për dy për qind dhe te dogana për 16,7 për qind. Kontributet sociale, sipas ribalancit të propozuar, do të shënojnë rritje prej 2,4 për qind.

Sa i përket shpenzimeve, sipas propozimit, janë zvogëluar masa e përgjithshme e pagave dhe kompensive për tre për qind, përkatësisht për 684 milionë denarë. Zvogëlim ka edhe te shkalla për mëditjet dhe udhëtimet zyrtare te të cilat shkurtimi te disa shfrytëzues është edhe deri në 50 për qind.