Komuna e Çairit nis shpërndarjen e 2000 koshave mbeturinash, në lagjen Dizhon. Një pjesë e koshave 120 litrash, do të shpërndahen edhe në lagje të tjera të Çairit, Gazi Babë dhe Seravë.

Qëllimi kryesor i këtij projekti është përmirësimi i kushteve të jetesës, dhe krijimi i sa më shumë mundësive që qytetarët të hedhin në vendin e duhur mbeturinat.

Projekti realizohet nga shoqata qytetare “Eko-Vita” në partneritet me Ndërmarrjen Publike “Higjiena Komunale”-Shkup. Deri në fund të vitit, është bërë e ditur se në të gjithë Shkupin, do të shpërndahen 20 mijë kosha mbeturinash.

“Ky projekt është një mundësi dhe angazhim i joni që qytetarëve të Çairit t’i ofrojmë një mjedis të bukur dhe të shëndoshë që jetën e qytetarëve ta bëjmë sa më të lehtë dhe sa më kualitative, ndërsa ambientet tona ku jetojmë dhe veprojmë sa më të bukura dhe sa më të shëndetshme”, deklaroi Izet Mexhiti, kryetar i komunës së Çairit.