Mbi 20 mijë banorë të fshatrave Çajlë, Forinë, Çegran dhe Koritë, deri në fund të këtij muaji do ta zgjidhin problemin me rrugën kryesore që lidh këto vendbanime me qytetin e Gostivarit.

Pas përfundimit të kanalizimit fekal dhe atmosferik, kanë filluar përgatitjet për asfaltimin e rrugës kryesore nga hekurudha në lagjen Pitarnicë e deri në kthesën për në fshatin Çajlë e Vjetër.

"Rruga ka një gjatësi prej 1362 metra , do të ketë një gjerësi të asfaltit prej 6 metra dhe trotuare nga të dyja anët me gjerësi 1 metër. Këtë rrugë e financon Banka Botërore, kurse realizimi i këtij projekti do të kushtojë rreth 17.5 milion denarë” tha Fatmir Dalipi nga Komuna e Gostivarit.

Ndërmarrja “Granit” nga Shkupi do të bëjë asfaltimin e rrugës Gostivar – Çajlë. Sipas inxhinierëve të kësaj ndërmarrjeje, punët për asfaltimin e kësaj rruge pritet të përfundojnë pas tri javëve. Paraprakisht, nga lagja Pitarnicë e deri te kthesa për në fshatin Çajlë e Vjetër, u vendosën shtylla për ndriçim publik.

Numri i shtyllave të vendosura është 27 dhe janë financuar me mjete të Komunës së Gostivarit në vlerë prej 1.413.000 denarë.