Studentët e Fakultetit Juridik të Universitetit Shtetëror të Tetovës, finalizuan iniciativën e Qendrës për shërbime studentore dhe karrierë për themelimin e Klubit të tyre studentor.

Në ambientet e Amfiteatrit të Fakultetit Juridik, në prani të një numri të madh të studentëve, drejtuesve të Fakultetit Juridik, udhëheqësve studentorë si dhe koordinatorit të Qendrës për shërbime studentore dhe karrierë të USHT-së, u promovua Klubi i studentëve të Fakultetit Juridik “Juristët e rinj”. Ky klub është i pari i këtij lloji i formuar nga ana e studentëve të USHT-së.

Koordinatori i Qendrës për shërbime studentore dhe karrierë të USHT-së, Daut Memeti, me rastin e promovimit të këtij klubi theksoi se Qendra për Shërbime Studentore dhe Karrierë, përkrah fuqishëm çdo iniciativë studentore të natyrës së këtillë, andaj edhe në të ardhmen përveç themelimit të Klubit Studentor “Juristët e rinj”, do të themelohen edhe një morri klubesh tjera në kuadër të universitetit.
“Iniciativa juaj, e cila ka për synim zgjimin e vetëdijes studentore dhe zgjeron horizontet për përfitimin e një kulture institucionale, ka hasur në mirëkuptim të thellë nga organet drejtuese të Universitetit Shtetëror të Tetovës”, theksoi Memeti.



I pranishëm në këtë promovim ishte edhe dekani i Fakultetit Juridik, Mr.sc. Agim Nuhiu, i cili theksoi se drejtuesit e Fakultetit, por edhe rektorati i USHT-së, gjithmonë kanë qene dhe do të jenë në përkrahje të iniciativave studentore. Ai me këtë rast shprehu edhe kënaqësinë e tij për faktin që Klubi i parë i këtij lloji, formohet pikërisht nga studentët e Fakultetit të cilin e drejton ai, pra të Fakultetit Juridik.

Kryetari i Parlamentit Studentor të USHT-së, Shaban Arsllani, në fjalën e tij përshëndetëse theksoi e Formimi i Klubit Studentor “Juristët e Rinj”, kontribuon në faktorizimin e studentëve, por njëkohësisht, siç tha nënkupton edhe përgjegjësi për profesionin e tyre të ardhshëm, aq më tepër kur dihet se shoqëria shqiptare në këtë lëmi ka nevojë të konsiderueshme. “Në SHBA, është e njohur ideja e Wisconsit se “ Kufijtë e Universitetit janë edhe kufijtë e Shtetit” ide e cila është materializuar në praktikë në shtetet e perëndimore”, theksoi kryetari i PS të USHT-së, Shaban Arsllani.
Kryetar i Klubit të Studentëve “Juristët e rinj” u zgjodh studenti i vitit të dytë Fatos Veliu.


Angazhimet kryesore të Klubit të Studentëve “Juristët e rinj”, do të jenë:
- Ngritja e vetëdijes studentore;
- Promovimi i vlerave studentore të F. Juridik – USHT;
- Themelimi i një reviste studentore në kuadër të F. Juridik – USHT;
- Organizimi i tryezave të rrumbullakëta me studentë dhe stafin universitar;
- Vizita e fakulteteve Juridike të universiteteve tjera të vendin dhe jashtë;
- Ndihma financiare për studentët F. Juridik – USHT në nevojë financiare dhe shumë angazhime tjera.

Gjatë periudhës së ardhshme pritet që klube të ngjashme të themelohen edhe në fakultetet tjera të USHT-së.