Vaksinimi falas kundër gripit të ri A (H1N1) për të gjithë qytetarët fillon sot në entet për mbrojtje shëndetësore në Maqedoni, ndërsa ilaçin tamiflu grupet e rrezikuara me recetë nga mjeku amë do të mund ta marrin nga barnatoret në shtëpitë shëndetësore, të cilat do të punojnë 24 orë.

Për momentin ka sasi të mjaftueshme të ilaçit tamiflu në shtet, informojnë nga Byroja për barëra. Dhjetë mijë kuti tamiflu janë shpërndarë nëpër barnatoret e shtëpive shëndetësore në Maqedoni.

Në Shkup, tamiflu do të jepet në barnatoret në poliklinikat e Bit Pazarit, në Draçevë, Çento "Jane Sandaksi", "Çair", "Idadia", "Bukuresht" dhe "Gjorqe Petrov".

Në Shkup, siç informon Ministria e Shëndetësisë, gjatë fundjavës janë vaksinuar mbi 200 persona, me ç'rast numri i përgjithshëm i të vaksinuarve arrin 2.100 persona.

Ministri i Shëndetësisë Bujar Osmani para disa ditëve i ftoi qytetarët që të vaksinohen dhe dërgoi apel që gripi i ri të kuptohet shumë seriozisht nga të gjithë, duke filluar nga qytetarët përmes mjekëve amë, infektologët, punonjësit tjerë në shëndetësi, si dhe të gjithë institutet, që kanë pika të përbashkëta me shëndetësinë ose kanë çfarëdo obligime në bazë të planit operativ për ballafaqim me pandeminë.

Komisioni për grip pandemik informoi se urgjentisht do të furnizohen 55 respiratorë për sektoret infektive nëpër spitale, ku ka stacionar, si dhe 80.000 vaksina.

Në Maqedoni deri tani nga gripi i ri i tipit A(H1N1)kanë vdekur 14 persona.