E mërkurë, 21.11.2018
Impresum - Marketing - Arkiva - Kontakt

Yll Press

Diplomatët që bënë emër në historinë e Shërbimit Diplomatik Shqiptar. Që nga Faik Konica, Fuad Asllani, Ruaf Fico, Eqerem Libohova, Eqrem Vlora, Behar Shtylla, e deri tek Zef Mazi, Agim Nesho, Roland Bimo e Luan Rama.
50 diplomatët më të shquar shqiptarë









Cilët janë diplomatët më të njohur të shtetit shqiptar që nga viti 1912 e deri më sot. Karriera dhe jetëshkrimi i tyre. Detyrat më të rëndësishme dhe momentet më të veçanta të punës së tyre. Sekretarët, konsujt e ministrat Fuqiplotë të kohës së Pavarësisë, të Zogut e ambasadorët e regjimit komunist, si dhe ata pas viteve ’90.

Diplomatët që bënë emër në historinë e Shërbimit Diplomatik Shqiptar. Që nga Faik Konica, Fuad Asllani, Ruaf Fico, Eqerem Libohova, Eqrem Vlora, Behar Shtylla, e deri tek Zef Mazi, Agim Nesho, Roland Bimo e Luan Rama. Gazeta “Tirana Observer” boton në suplementin “Weekend” 50 diplomatët më të shquar. Ndërkohë gazeta pret dhe sugjerime nga lexuesit për diplomatë të tjerë.

Faik Konica

Faik Konica është një nga personalitetet më të rëndësishme të Rilindjes Kombëtare dhe ndër diplomatët më të shquar shqiptarë. “Njeriu i letrave” u emërua Ministër Fuqiplotë në SHBA nga Mbreti Zog në fillim të vitit 1926 dhe qëndroi në këtë detyrë deri në vitin 1939, kur filloi Lufta e Parë Botërore dhe Shqipëria u pushtua nga italianët. Ai ishte dekani i trupit diplomatik në Amerikë, një titull honorifik, meritë e njërit prej shqiptarëve më të shquar në marrëdhëniet ndërkombëtare. Konica lindi në Korçë në vitin 1875 dhe arsimin fillor e kreu në Shkodër. Studimet universitare i kreu në Fakultetin e Letrave në Dizhon të Francës në vitin 1895. Pas vitit 1909 shkoi në SHBA dhe në vitin 1921 u zgjodh President i Federatës Panshqiptare “Vatra”, shoqatën më me ndikim të diasporës shqiptare. Konica shërbeu si përfaqësues i denjë i Shqipërisë në SHBA për gati 13 vjet. “Si një përfaqësues i një vendi të vogël, pakkush nga diplomatët i ka bërë vetes një vend kaq të rëndësishëm…”, shkruante për Konicën gazeta amerikane “Ëashington Merry-Go-Round”, më 12 prill të vitit 1939.

Eqerem bej Vlora

Diplomati i karrierës dhe historiani i njohur shqiptar, Eqerem Vlora, studioi në Akademinë Diplomatike të Vjenës. Në vitin 1904 filloi punën në Ministrinë e Jashtme Osmane si sekretar legjislativ deri sa arriti shkallën e këshilltarit të ambasadës. Me shpalljen e pavarësisë, u dekretua si Sekretar Shteti pranë MPJ. Në shkurt të vitit 1914 qeveria e dërgon Vlorën si këshilltar tek Princ Vidi për ta përgatitur për situatën dhe kushtet e Shqipërisë së asaj kohe. Në vitin 1927 u fut në shërbimin diplomatik shqiptar dhe u dekretua i ngarkuar me punë në Legatën tonë në Londër me titullin e Ministrit Rezident. Nga Londra u kthye në Shqipëri në dispozicion të MPJ, ndërsa disa muaj më pas caktohet Ministër Rezident në Athinë. Në maj të vitit 1933 emërohet drejtor politik i MPJ-së e më pas Sekretar i Përgjithshëm. Zgjidhet deputet e në korrik të 1944 caktohet Ministër i Punëve të Jashtme, detyrë të cilën e kreu për 40 ditë. Pas luftës Vlora migroi në Itali e më pas në Vjenë ku edhe vdiq, më 30 prill të vitit 1964.

Eqerem Libohova

Lindi në Libohovë në vitin 1881 dhe mbaroi studimet e larta pranë Akademisë Ushtarake të Kavalerisë në Bruksel. Pasi kreu një sërë funksionesh të larta në ushtrinë turke, e më pas në atë shqiptare, angazhohet nga qeveria e Turhan Pashës si përfaqësues i Shqipërisë në Romë. Shkarkohet nga qeveria e mëparshme, në kulmin e acarimeve italo-shqiptare për Luftën e Vlorës, duke u konsideruar si filoitalian. Përsëri rikthehet në Romë me qeverinë e Xhaferr Ypit. Shërben atje me shkëputje të herëpashershme për rreth 10 vite. Mbas majit të vitit 1933 caktohet Ministër Fuqiplotë në Paris. Më pas, në ’36-n, dekretohet Ministër i Punëve të Jashtme. Në ditët e fundit të marsit 1939, bashkë me Zef Serreqin, u dërgua për marrëveshje me italianët. Që të dy të dërguarit mbetën në Itali duke mos e zbatuar detyrën që u kishte ngarkuar Mbreti. Ndërkohë në ’43-shin, Libohova u bë kryeministri i Shqipërisë, megjithëse për pak kohë. Në Itali kaloi vitet e fundit të jetës së tij, derisa vdiq në vitin 1948.

Dhimitër Popa

Diplomat i karrierës dhe shtetar shqiptar lindi në Durrës në vitin 1890. Studioi Jurisprudencë pranë Universitetit të Napolit e më pas Fakultetin Juridik në Athinë. Me krijimin e Legatës tonë në Athinë, Dhimitër Popa u dekretua Sekretar I i asaj legate e shpeshherë kreu edhe detyrën e të ngarkuarit me punë. Ai shërbeu në Athinë deri në vitin 1925 e më pas u kthye në Ministrinë e Punëve të Jashtme si funksionar i rëndësishëm. Pati funksionin e Drejtorit të Seksionit Politik dhe më pas të Sekretarit të Përgjithshëm të Ministrisë së Jashtme. Në mars të vitit 1932 u dekretua si Ministër Fuqiplotë i Shqipërisë në Sofje, ku shërbeu deri në fund të vitit 1933. U kthye në atdhe dhe qëndroi në dispozicion të Ministrisë së Punëve të Jashtme. Nga marsi 1937 deri në pushtimin e vendit shërbeu si sekretar i Oborrit Mbretëror me trajtimin financiar e Ministrit Fuqiplotë të Klasit të Parë. Qeveria italiane e dekoroi Popën me medaljen e “Kordonit të Madh të Kurorës Italiane”. Dhimitër Popa së bashku me Petraq Pepon kanë qenë pjesëtarë të delegacionit shqiptar në Konferencën e Paqes në Paris që kryesohej nga Enver Hoxha në vitin 1946. Ai punoi në MPJ deri në shkurtin e vitit 1951.

Dhimitër Berati

Diplomati i rangut të lartë lindi në Korçë në vitin 1886. Kreu Fakultetin e Shkencave Politike e Administrative të Universitetit të Bukureshtit. Në vitin 1920 filloi punë në Ministrinë e Jashtme si sekretar për punët politike e komerciale. Më pas dekretohet si sekretar i Dërgatës shqiptare pranë Konferencës së Ambasadorëve në Paris. Ai zëvendësoi edhe Mithat Frashërin në prill të vitit 1922, gjatë mungesave të zgjatura të tij. Më pas ai caktohet komisar i shtetit shqiptar në Komisionin Ndërkombëtar të Kufijve. Berati u kthye në MPJ, në vitin 1923 ku u dekretua si drejtor politik i ministrisë deri në vitin 1924, kur u dekretua në Bullgari me titullin e Kryekonsullit. Në fund të dhjetorit të këtij viti, zëvendëson Xhemil Dinon si i ngarkuar me punë në Paris, duke qenë i akredituar edhe në Londër. Pushohet nga puna dhe në deri në ’27-n jeton në Rumani. Kthehet në MPJ dhe në mars të ’29-s caktohet përfaqësues i Shqipërisë në Lidhjen e Kombeve. Pas disa detyrave në kabinete qeveritare, dekretohet si Ministër Fuqiplotë në Romë. Edhe pas shkrirjes së MPJ-së, ai mbeti si ministër Fuqiplotë pranë MPJ italiane. Në ’44-n largohet familjarisht në migracion politik në Itali. Vdes në shtator të vitit 1970.

Rauf Fico

Personalitet i rëndësishëm shtetëror dhe parlamentar, Fauf Fico u fut në shërbimin diplomatik shqiptar në vitin 1926 kur u dekretua Ministër Fuqiplotë i Shqipërisë për Turqinë dhe Bullgarinë me rezidencë në Ankara. Ai i përket asaj plejade intelektualësh që erdhën nga administrata turke për të kontribuar për atdheun e tyre. Në vitin 1928 dekretohet Ministër Fuqiplotë në Beograd, ku kishte nën varësi edhe Ankaranë. Fico ishte një poliglot. Ai dinte 8 gjuhë të huaja. Në vitin 1929 u emërua Ministër i Punëve të Jashtme, post që e mbajti deri në vitin 1930.

Fuad Asllani

Lindi në Bejrut në vitin 1897, në një familje funksionarësh të lartë të Perandorisë Osmane. Përfundoi studimet në Austri me doktoraturë Fakultetin e Drejtësisë. Në vitin 1929 fillon karrierën diplomatike si drejtor administrativ e konsullor në Ministrinë e Jashtme, e më pas caktohet i ngarkuar me punë provizorisht në Sofje. Në maj të vitit 1933 emërohet i ngarkuar me punë pranë Legatës shqiptare në Londër e disa muaj më pas, Ministër Fuqiplotë. Caktohet delegat permanent në Lidhjen e Kombeve. U shqua për luftën diplomatike kundër kulisave greko-serbe ndaj vendimit të qeverisë shqiptare për mbylljen e shkollave të huaja në Shqipëri dhe për vendosjen në Shqipëri të një pjesë hebrenjsh të përzënë nga nazistët. Në ‘34-n dekretohet Ministër Fuqiplotë i Klasit të Parë në Londër. Në ‘35-n vihet në krye të diplomacisë shqiptare, si Ministër i Jashtëm. Ai kontribuoi në normalizimin e marrëdhënieve, lidhjen e marrëveshjeve ekonomike dypalëshe dhe për riorganizimin e shërbimit diplomatik. Dinte 10 gjuhë të huaja. Vdiq në vitin 1981.

Iljaz Vrioni

Lindi në Berat në vitin 1883. Kreu shkollën e lartë administrative në Stamboll. Kabineti i Sulejman Delvinës i dërgon atë dhe Kolë Tromarën me mision diplomatik jozyrtar në Romë, Paris dhe Athinë për të mbështetur veprimtarinë e delegacionit shqiptar në Konferencën e Paqes në Paris. Në vitin 1920 zgjidhet kryeministër dhe ministër i Punëve të Jashtëm. Qeveritë e Vrionit parashtruan, ndoqën dhe zgjidhën detyra të mëdha, veçanërisht në politikën e jashtme të Shqipërisë, siç ishin ruajtja e pavarësisë ndërkombëtare e në veçanti përfaqësimi i Shqipërisë në Lidhjen e Kombeve. Gjatë periudhës së qeverisjes së tij, Shqipëria u pranua anëtare e Lidhjes së Kombeve. Me këmbënguljen e tij u hapën konsullatat shqiptare në Bari, Stamboll, Bernë, Vjenë, Sofje etj. Ai kërkonte që të hapeshin domosdo legatat shqiptare me përfaqësues të përhershëm. Kur problemet shqiptar ndodheshin para pengesash të mëdha për zgjidhje, në mbledhjet e Lidhjes së Kombeve Iljaz Vrioni shkonte vetë për të mbrojtur të drejtat e kombit shqiptar. Si diplomat i kujdesshëm dhe me përvojë synonte të zgjidhte problemet me fqinjët me mbështetje të Lidhjes së Kombeve. Ai ishte Ministër Fuqiplotë në Francë, më pas në oborret mbretërore të Spanjës e të Belgjikës. Vdiq në vitin 1932 në Francë.

Ali Asllani

Ali Asllani e filloi karrierën diplomatike si konsull i Shqipërisë në Trieste në korrik të vitit 1922. I ardhur nga shkolla turke, Asllani kishte kryer një sërë funksionesh politike që nga viti 1912 si sekretar i Përgjithshëm i Këshillit të Ministrave, sekretar i Kryeministrit, nënprefekt i Fierit, kryetar i Bashkisë së Vlorës etj. Kështu, ai qëndroi në detyrën e konsullit deri në vitin 1925, e më pas dekretohet si përfaqësues shqiptar në Bullgari, me titull Kryekonsull dhe njëkohësisht i ngarkuar me punë. Me ardhjen e Rauf Ficos si ministër Fuqiplotë në Sofje, Asllani qëndroi me rangun e sekretarit të Parë të Legatës dhe si i ngarkuar me punë kur titullari qëndronte në rezidencën e tij në Ankara. Ndërkohë në vitin 1928, kur edhe në Sofje u vendos një ministër rezident, ai u dekretua me këtë rang diplomatik dhe si i tillë qëndroi deri në vitin 1930. Ai ishte gjithashtu edhe i ngarkuari me punë i Shqipërisë në Bukuresht. Në prill të vitit 1930 dekretohet si ministër Fuqiplotë në Athinë, post të cilin e mban për dy vjet, e më pas kalon në dispozicion të Ministrisë së Jashtme. Ndahet nga jeta në vitin 1966.

Xhemil Dino

Xhemil Dino është diplomat i rangut të lartë që shërbeu në diplomaci gjatë gjithë viteve të veprimtarisë shtetërore të tij. Lindi në Prevezë në vitin 1894 dhe kreu studimet për Drejtësi në Fakultetin Juridik të Universitetit të Romës. Këshilltar i kryeministrit Iljaz Vrioni, Dino u dekretua sekretar për korrespondencën me Lidhjen e Kombeve, ndërsa më vonë u emërua zv.sekretar i Përgjithshëm i MPJ-së. Në vitin 1922 ai dekretohet Sekretar i Legatës Shqiptare në Paris. Ai ishte njëkohësisht edhe përfaqësues i Shqipërisë në Lidhjen e Kombeve. Nga shkurti 1925 deri në 17 maj të atij viti, Dino ishte dekretuar Sekretar i Përgjithshëm i MPJ-së. Pikërisht në këtë kohë dekorohet nga presidenti i Francës “Oficer i Legjionit të Nderit”. Shkëputet për disa kohë nga diplomacia pasi zgjidhet deputet, por në vitin 1926 shërben si i ngarkuari me punë në Bukuresht. Pas disa muajsh, dekretohet Ministër Fuqiplotë i Shqipërisë në Romë, ku shërben për katër vjet. Në vitin 1931 caktohet Ministër Fuqiplotë në Londër, ndërkohë që pas vdekjes së Iljaz Vrionit, ai shërbeu edhe si Ministër Rezident për Francën me rezidencë në Londër. Në vitin 1939 arrin kreun e diplomacisë shqiptare, duke u vënë Ministër i Punëve të Jashtme. Vdiq në vitin 1972 në Madrid dhe u varros në Romë.

Javer Malo

Javer Malo është një nga diplomatët më të kompletuar gjatë regjimit komunist. Ai lindi në Delvinë dhe studioi për Gazetari në Moskë dhe më pas në Paris. Javer Malo ka qenë një nga gazetarët më të mirë shqiptarë të periudhës së pas Luftës së Dytë Botërore. Në vitet 1950-1956 ai punon si atashe kulturor në ambasadën tonë në Paris. Në vitin 1956 ai kthehet në Shqipëri, ku punon si gazetar, ku ai shquhet për shkrimet e tij, por njëkohësisht i kushtohet edhe diplomacisë. Në vitin 1967 ai emërohet ambasador i Shqipërisë në Francë, post të cilin e mban deri në vitin 1975. Pas kësaj periudhe ai kthehet në Shqipëri, ku emërohet në poste shumë të larta. Njohës i shumë gjuhëve të huaja, Javer Malo është edhe autor dhe përkthyes i shumë librave kushtuar gazetarisë dhe diplomacisë. Javer Malo vdiq në vitin 1997 dhe vetëm pak kohë më parë kishte publikuar librin me kujtimet e tij “Paris ‘67-‘75”.

Dhimitër Lamani

Dhimitër Lamani do shkëlqente si diplomat i njohur karriere gjatë regjimit komunist. I diplomuar në Bashkimin Sovjetik, diplomati i njohur Dhimitër Lamani do rreshtohej menjëherë në radhët e diplomacisë shqiptare. Në vitin 1958 ai emërohet ambasador në një nga ambasadat më të rëndësishme të vendit tonë gjatë regjimit komunist në atë të Francës. Dhimitër Lamani e mbajti këtë post për gati 7 vjet, nga viti 1958 deri në vitin 1965. Gjatë kësaj periudhe që ai drejtoi ambasadën shqiptare në Paris, ku marrëdhëniet midis dy vendeve u forcuan shumë dhe pati një lidhje të rëndësishme midis të dyja vendeve. Kjo edhe për vetë faktin se Shqipëria në atë periudhë ishte një vend i izoluar nga vendet e tjera perëndimore.

Nesti Nase

Nesti Nase është padyshim kryediplomati më jetëgjatë i shtetit shqiptar. Ai e drejtoi Ministrinë e Jashtme për gati 16 vjet. Nesti Nase u bë ministër i Jashtëm në vitin 1966, një vit pas prishjesh së marrëdhënieve me Bashkimin Sovjetik. Roli i tij si kryediplomat në ato vite ka qenë shumë i vështirë, pasi vendi ndodhej gjithmonë edhe më i izoluar pas prishjes së marrëdhënieve diplomatike me ish-Bashkimin Sovjetik. Para se të emërohej në krye të Ministrisë së Jashtme Nesti Nase vinte nga një karrierë e gjatë diplomatike. Ai kishte qenë ambasador i vendit tonë në dy nga vendet më të rëndësishme për marrëdhëniet diplomatike shqiptare, në Bashkimin Sovjetik dhe në Kinë. Por kryediplomati shqiptar pati një fund tragjik, pasi në vitin 1982 ai së bashku me shumë krerë të lartë të qeverisë së asaj kohe akuzohen se kishin krijuar grup armiqësor për rrëzimin e komunizmit. Pas këtyre akuzave Nesti Nase u dënua me shumë vite burg dhe u lirua vetëm në fund të viteve ‘90. Kryediplomati shqiptar vdiq në vitin 1995.

Sokrat Plaka

Sokrat Plaka është cilësuar si një diplomat i rangjeve të larta në periudhën e regjimit komunist. Ambasadori i njohur i kishte ngjitur shkallët e diplomacisë një nga e një dhe kishte marrë shumë poste të rëndësishme. Sokrat Plaka që kishte mbaruar studimet universitare për Diplomaci në Moskë, në një nga institutet diplomatike më të njohur në botë dhe që kishte përvojë pune në MPJ. Ai ka qenë ambasador i Shqipërisë në Jugosllavi për disa vjet dhe në fillim të viteve ’80, Sokrat Plaka ka qenë edhe numri dy i Ministrisë së Jashtme të vendit tonë. Sokrat Plaka mbahet mend në diplomacinë shqiptare për punën e tij të madhe në fuqizimin e marrëdhënieve me Greqinë dhe Turqinë në fillim të viteve ‘80. Kjo solli edhe zbutjen e marrëdhënieve midis këtyre vendeve dhe Shqipërisë.

Ksenofon Nushi

Ksenofon Nushi është padyshim një nga ambasadorët më jetëgjatë të diplomacisë shqiptare të periudhës së regjimit komunist. I diplomuar jashtë vendit në fushën e diplomacisë Ksenofon Nushi ka shërbyer për shumë vite në diplomacinë shqiptare. Në vitin 1967 ai emërohet ambasador i Shqipërisë në Itali, post të cilin e mbajti deri në vitin 1972. Më pas ai kthehet në Shqipëri, ku punon në Ministrinë e Jashtme, ku më pas ai emërohet zv.ministër i Jashtëm. Këtë post diplomati i njohur e mban deri në momentin e arrestimit të ish-ministrit të Jashtëm dhe diplomatit të njohur, Nesti Nase. Në vitin 1986 diplomati Ksenofon Nushi emërohet ambasador në Francë, post të cilin e mbajti deri në vitin 1989.

Vasil Nathananaili

Vasil Nathananaili do shkëlqente në diplomacinë shqiptare gjatë regjimit komunist në mesin e viteve ’50, kur për gati tre vjet ai drejtoi një nga ambasadat më të rëndësishme të vendit tonë, atë në Bashkimin Sovjetik. I ardhur nga një karrierë e gjatë në fushën e diplomacisë gjatë viteve si ambasador në Bashkimin Sovjetik, Nathanaili u shqua për korrektesë si dhe për zgjuarsi në marrëdhëniet midis dy vendeve. Në sajë të zotësisë dhe eksperiencës së tij, në vitin 1957 menjëherë pas kthimit të tij nga Moska, ai u emërua zv.ministër i Jashtëm. Gjatë kohës që ai mbante këtë post ai arriti të sjellë në Shqipëri armën që u pushkatua Benito Musolini dhe e dashura e tij, Clara Petaçi. Arma iu bë dhuratë Muzeut tonë Kombëtar nga ana e Valter Audisio, komandanti i togës së partizanëve që pushkatoi Benito Musolinin.

Kahreman Ylli

Lindi në Skrapar në vitin 1917. Kreu studimet e larta në Lion të Francës në fushën e pedagogjisë. U lidh me Lëvizjen Antizogiste e Antifashiste të Emigracionit Politik në Francë dhe u aktivizua në Luftën Nacional-Çlirimtare. Pas çlirimit kreu funksione të larta partiake e shtetërore. Në vitin 1947-1949, Ylli përfaqësoi me dinjitet Shqipërinë në shumë forume ndërkombëtare për problemet e arsimit dhe të kulturës. Ai ishte ambasador i Shqipërisë në Francë gjatë kësaj periudhe. Më pas, Ylli ishte ministër i Arsimit gjatë viteve 1949-1952, rektor i Universitetit të Tiranës 1961-1970 etj. Në krye të misioneve diplomatike Ylli mbrojti të drejtat e popullit shqiptar dhe interesat e vendit. Ylli ka qenë deputet në Kuvendin Popullor në të gjitha legjislaturat.

Pertef Hasamataj

Pertef Hasamataj është cilësuar si një nga diplomatët më të mirë shqiptarë gjatë regjimit komunist. Ai ka punuar si diplomat për gati 15 vjet, në poste shumë të rëndësishme. I lindur në Vlorë, Pertef Hasamataj u diplomua në vitin 1961 në universitetin “Gorki” në Moskë dhe më pas diplomohet në Fakultetin Histori-Filologji, dega Anglisht. Në vitin 1977 Pertef Hasamataj emërohet ambasador në Kubë, post të cilin e mban deri në vitin 1985. Më pas, për gati pesë vjet, nga vitit 1985 deri në vitin 1990, punon në zyrën konsullore të dhënies së vizave në Ministrinë e Jashtme. Pas lidhjeve të marrëdhënieve diplomatike të vendit tonë me Bashkimin Sovjetik, pas gati 20 vjet ndërprerjeje në vitin 1990 Pertef Hasamataj emërohet ambasador në këtë vend, post të cilin e mban deri në vitin 1992.

Petraq POJANI

Lindi në Tiranë më 19 korrik të vitit 1935. Kreu studimet në Institutin e Marrëdhënieve Ndërkombëtare në Moskë gjatë viteve 1954-1960. Pas kryerjes së studimeve fillon punë ne Ministrinë e Punëve të Jashtme. Nga viti 1961 deri në vitin 1980 është anëtar i Delegacionit Shqiptar në sesionet e AP të OKB-së dhe nga viti 1971-73 është këshilltar në Misionin e Përhershëm të Shqipërisë në Organizatën e Kombeve të Bashkuara, Nju Jork. Në vitin 1980 emërohet drejtor i Drejtorisë së Organizatave Ndërkombëtare dhe më pas, ambasador i Shqipërisë në Francë, akredituar edhe në Belgjikë, Holandë, Luksemburg, Portugali dhe UNESKO. Nga viti 1983-‘87 është sekretar i Përgjithshëm i Komitetit Shqiptar të Marrëdhënieve Kulturore dhe Miqësore me Botën e Jashtme dhe më pas deri në ’90-n, është drejtor i Drejtorisë së Bashkëpunimit Shumëpalësh, koordinator për Bashkëpunimin Ballkanik. Më pas emërohet ambasador në Belgjikë dhe i akredituar në Holandë dhe Luksemburg, shef i Misionit të Shqipërisë pranë Komunitetit Evropian. Merret me veprimtari private gjatë viteve ‘93-‘97 dhe më pas kthehet në diplomaci si anëtar i Këshillit të Ambasadorëve pranë MPJ. Ministrat e kanë preferuar si këshilltar të tyre për shkak të eksperiencës 40-vjeçare në diplomaci.

Maxhun Peka

Maxhun Peka është cilësuar si një diplomat karriere. Peka, ka një eksperiencë të madhe në diplomacinë shqiptare. Në vitin 1980 ai emërohet ambasador i vendit tonë në Vietnam, post të cilin e mban deri në vitin 1983, kur emërohet ambasador Fuqiplotë i Shqipërisë në një nga shtetet më të fuqishme perëndimore, në Francë. Ai qëndroi në këtë post për disa vjet. Pas viteve ’90, Maxhun Peka mori edhe disa poste të tjera të rëndësishme në diplomacinë shqiptare. Në vitin 2005 ai emërohet Sekretari i Përgjithshëm i Këshillit të Ministrave të drejtuar nga Sali Berisha dhe në vitin 2006 Presidenti Moisiu e dekreton si Ambasador i Shqipërisë në Republikën Popullore të Kinës, post që e mbajti deri në vitin 2011.

Agim Fagu

Basketbollisti i njohur i viteve ’70, Agim Fagu, nuk do shkëlqente vetëm në parketin e fushës së basketbollit, por edhe në arenën e diplomacisë shqiptare. Diplomati i njohur do t’i futej politikës pas viteve ‘89, ku ai nuk do ngurronte të shpallej edhe kandidat për kreun e bashkisë së kryeqytetit. Në vitin 1998 legjenda e basketbollit shqiptar emërohet ambasador i Shqipërisë në Mbretërinë e Bashkuar në Londër. Ai qëndroi në këtë post për gati 7 vjet, nga viti 1998 deri në vitin 2005, dhe gjatë kësaj periudhe luajti një rol të madh në përmirësimin e marrëdhënieve midis dy vendeve si dhe lehtësimin e procedurave të vizave. Agim Fagu u largua nga posti i ambasadorit të Shqipërisë në Angli në vitin 2005.

Arben Cici

Lindi në Korçë në 5 maj të vitit 1960. Kreu studimet në Algjeri për gjuhën arabe dhe frënge në vitet 1981-1987. Kthehet në Shqipëri dhe fillon punë si pedagog pranë Fakultetit të Gjuhëve të Huaja. Përfundon një specializim për Diplomaci dhe emërohet në Ministrinë e Punëve të Jashtme fillimisht si specialist. Në vitin 1992 emërohet ambasador në Moskë dhe në vitin 1996, pasi kryen të plotë mandatin, kthehet si shef i Protokollit në ministri. Në vitin 2000 emërohet përsëri ambasador në Kroaci deri në vitin 2006 kur mbaron mandatin. Dekorohet për shërbimin e tij nga presidenti kroat, Stipe Mesiç. Kthehet sërish në punën e mëparshme në Ministrinë e Jashtme si shef i Protokollit dhe dekorohet edhe nga Presidenti Moisiu “Për mirënjohjen ndaj punës së tij në fushën diplomatike”. Tani është ambasador i Shqipërisë në Danimarkë.

Lisen Bashkurti

Lisen Bashkurti ka lindur në qytetin e Shkodrës në vitin 1957. Nga viti 1987 deri në vitin 1992, u përfshi tërësisht në jetën politike të vendit. Në fillim të viti 1992 është specializuar me grupin e parë të ambasadorëve, ku jepnin mësim një grup profesorësh nga Ministria e Jashtme gjermane. Ka qenë lektor pothuajse në të gjitha kolegjet evropiane. Ka qenë ambasador i Republikës së Shqipërisë në Hungari, pranë Këshillit të Evropës në Bruksel dhe më pas përfaqësues i Shqipërisë në OKB. Ka qenë drejtor i Analizë-Prognozës në Ministrinë e Punëve të Jashtme. Ka hulumtuar në fushën e Marrëdhënieve Ndërkombëtare dhe ka shkruar “Historinë e Diplomacisë” në dy vëllime. Tani është President i Akademisë Diplomatike Shqiptare

Dashnor Dervishi

Dashnor Dervishi është ndoshta një nga diplomatët më të vjetër shqiptarë akoma aktiv. I cilësuar si një diplomat karriere, ai ka dhënë një kontribut të madh në diplomacinë shqiptare. Në vitin 1988 Dashnor Dervishi emërohet ambasador i Shqipërisë në Itali, post që e mbajti deri në vitin 1992, duke hyrë në histori edhe si ambasadori i fundit i Shqipërisë komuniste në Itali. Në dhjetor të vitit 1998, diplomati i njohur Dashnor Dervishi emërohet ambasador Fuqiplotë i Shqipërisë në Izrael, post të cilin e mbajti deri në vitin 2003. Që nga viti 2003 e deri në vitin 2005, Dashnor Dervishi punoi si drejtor i Drejtorisë së Përgjithshme Rajonale në Ministrinë e Jashtme. Në vitin 2006 diplomati i njohur emërohet ambasador Fuqiplotë i Shqipërisë në Rumani. Tani Dervishi është ambasador i Shqipërisë në Greqi.

Agim Isaku

Agim Isaku është padyshim një nga diplomatët më të mirë të viteve ‘90. I lindur në Korçë Agim Isaku është padyshim edhe një shkrimtar i mirë. Pas rrëzimit të regjimit komunist diplomati Isaku u angazhua në politikën shqiptare. Në vitin 1997 ai emërohet këshilltar i Presidentit Meidani, post të cilin e mban deri në vitin 2000, kur emërohet ambasador i Shqipërisë në Spanjë. Këtë post ai e mbajti për gati dy vjet, deri në vitin 2002, kur emërohet këshilltar i ish-kryeministrit Fatos Nano. Ai qëndron në këtë post deri në vitin 2005 dhe më pas në zgjedhjet e korrikut hedh kandidaturën për deputet, por nuk arrin të fitojë. Tani ai është ambasador i Shqipërisë në Sllovaki.

Agim Nesho

Lindi më 29 mars të vitit 1956 në Tiranë. Kreu studimet fillimisht për Inxhinieri dhe më pas për Drejtësi. Në vitin 1981 nis karrierën në shërbimin diplomatik, duke u emëruar në Ministrinë e Punëve të Jashtme. Në vitin 1997 deri në vitin 2006 është ambasador i Shqipërisë në Organizatën e Kombeve të Bashkuara në Nju Jork. Në misionin shqiptar në Nju-Jork, veçohet aktiviteti i madh që ka kryer misioni gjatë krizës në Kosovë dhe negocimeve të Këshillit të Sigurimit për t’i dhënë legjitimitet veprimit të forcave të NATO-s për të ndaluar dhunën dhe gjenocidin e ushtruar nga regjimi i Millosheviçit ndaj shqiptarëve në Kosovë. Gjithashtu është për t’u përmendur detyra e tij si zv.president i Organizatës Ekonomiko-Sociale të Kombeve të Bashkuara. Nesho është një nga ambasadorët më jetëgjatë pas viteve ’90. Ka qenë edhe këshilltar i ish-kryeministrit Nano si dhe ka punuar në Akademinë e Shkencave.

Luan Rama

Për meritat e tij si ambasador në Francë, presidenti frëng Zhak Shirak e vlerësoi me dekoratën e lartë “Grand Officier de l’Ordre National du Mérite” në vitin 2002. Luan Rama lindi në 5 janar të vitit 1952 në Tiranë. Kreu studimet në Fakultetin e Shkencave Politike-Juridike, dega Gazetari dhe në Universitetin e Parisit Denis Diderot, “Communication, cinema, audiovisuel”. Pas arritjeve të mëdha si skenarist dhe autor i më se 40 filmave dokumentarë, Rama u fut në shërbimin diplomatik shqiptar. Në vitin 1992-1993 është i ngarkuar me punë në ambasadën shqiptare në Paris. Po atje, rikthehet në ’97-n, po me rangun e ambasadorit, gjithashtu dhe i akredituar si ambasador në Portugali, Monaco, Algjeri deri në vitin 2001. Gjatë viteve 2002-2005 është zv.delegat i Shqipërisë në Unescos. Anëtar i Këshillit të Lartë të Frankofonisë gjatë viteve 2003-2007. Rama ka kryesuar disa delegacione të Organizatës Ndërkombëtare të Frankofonisë për vëzhgimin e zgjedhjeve si dhe ka përfaqësuar Shqipërinë në disa konferenca ndërkombëtare. Ka botuar një seri analizash politike dhe për çështjet ndërkombëtare si dhe libra që lidhen me diplomacinë.

Shaqir Vukaj

Lindi më 20 gusht të vitit 1942 në Malësi të Madhe. U diplomua për Inxhinier Kimist, Teknolog. Punon për 15 vjet në profesionin e tij, si kryeinxhinier dhe drejtor i Ndërmarrjes Ushqimore, Shkodër. Në vitin 1976 futet në shërbimin diplomatik shqiptar. Deri në vitin 1978 punon si Sekretar i Parë i Ambasadës në Çekosllovaki. Në vitet 1978-1984 dekretohet si i ngarkuar me punë në Bullgari. Në vitet 1998 deri në vitin 2002 shërben si ambasador në Rusi e më pas në Republikën Çeke deri në vitin 2006. Përveç karrierës diplomatike, Vukaj është angazhuar edhe karrierën politike. Gjatë vitit 1991-1992 dhe 1996-1997 ka qenë deputet në Kuvendin e parë Pluralist. Nga viti 1992-1996 nënkryetar i Kuvendit të Shqipërisë. Ka pasur dy herë poste ministrore, në muajt mars-korrik ’97 ka qenë në krye të Ministrisë së Mbrojtjes në Qeverinë e Pajtimit Kombëtar dhe nga korrik ‘97–prill’98 ministër i Tregtisë dhe Turizmit.

Ferit Hoxha

Ferit Hoxha lindi më 22 shkurt në qytetin e Shkodrës. Ai u diplomua në vitin 1988 në Fakultetin e Gjuhëve te Huaja; Gjuhë dhe Kulture Frënge, Universiteti i Tiranës, Shqipëri. Ai gjithashtu është diplomuar edhe në Institutin Holandez të Marrëdhënieve Ndërkombëtare “Clingendael”, Hagë. Eksperiencën e parë si diplomat ai e nisi në vitin 1991, në Ministrinë e Jashtme. Më pas në vitin 1998 emërohet ambasador i Jashtëzakonshëm dhe Fuqiplotë, shef i Misionit të RSH-së pranë Bashkimit Evropian, Bruksel, post të cilin e mban deri në vitin 2001. Më pas në vitet 2001-2006 emërohet ambasador i Jashtëzakonshëm dhe Fuqiplotë i RSH-së pranë Republikës Franceze, Paris dhe në vitet 2003-2006 ambasador i Jashtëzakonshëm dhe Fuqiplotë i RSH-së në Republikën Portugeze, me rezidencë në Paris. Nga viti 2006 deri në vitin 2009 është sekretar i Përgjithshëm i Ministrisë së Punëve të Jashtme. Në vitin 2009 emërohet ambasador i Shqipërisë në OKB, por është gjithashtu i akredituar si ambasador edhe për Kubën.

Qazim Tepshi

Qazim Tepshi është një nga ambasadorët më të mirë të diplomacisë shqiptare. Ai ka një bekgraund të madh në fushën e diplomacisë që në periudhën e regjimit komunist e deri në vitet e fundit. Në vitet e regjimit komunist Qazim Tepshi është vlerësuar si një diplomat karriere. Pas rrëzimit të regjimit komunist ai iu kushtua pjesërisht politikës, ku në një periudhë ishte edhe deputet i Parlamentit Shqiptar. Qazim Tepshi i ka kushtuar një pjesë të madhe të punës së tij edhe çështjes së Kosovës dhe nuk ka ngurruar të shkruajë edhe libër për diplomacinë në lidhje me këtë çështje. Në vitin 2005 Qazim Tepshi emërohet ambasador i Shqipërisë në Çeki, post që e mban deri në vitin 2010.

Riza Poda

Lindi në Elbasan më 23 mars të vitit 1958. Në vitin 1981 kreu studimet për Gjuhë-Letërsi Angleze dhe në 1985-1989 për Drejtësi. Në vitin 1992 specializohet në Universitetin e Gjenevës për Të Drejtën Ndërkombëtare. Fillimet në shërbimin diplomatik i ka në vitin 1998 kur emërohet në Ministrinë e Punëve të Jashtme me detyrë drejtor i Zyrës së Përfaqësimit Ligjor të Shtetit Shqiptar në Gjykatën Evropiane të të Drejtave të Njeriut, zyrë të cilën e themelon. Më pas punon si përfaqësues i Përhershëm i MPJ-së, pranë Komitetit Drejtues të të Drejtave të Njeriut në Këshillin e Evropës, Strasburg. Gjithashtu kryen disa specializime pranë Ministrisë së Punëve të Jashtme të Holandës dhe të Zvicrës, Këshillit të Evropës etj. Në vitin 2000 emërohet shef i Misionit Diplomatik i Shqipërisë në Kanada. Tani është konsull i përgjithshëm i Shqipërisë në Selanik.

Valter Ibrahimi

Diplomati i njohur Valter Ibrahimi lindi në Tiranë 28 korrik 1963. Ai u diplomua në Universitetin e Tiranës në vitin 1988. Në dhjetor të vitit 1992, pas disa vjet eksperience në marrëdhëniet me jashtë, ai fillon punë në Ministrinë e Jashtme dhe më vonë emërohet sekretar i ambasadës tonë në Rumani. Më pas nga viti 1993 deri në vitin 1997 punon në ambasadën shqiptare në SHBA si drejtues për marrëdhëniet e Shqipërisë me vendet e Amerikës Veriore. Në gusht të vitit 2001 ai emërohet sekretar i ambasadës tonë në Pragë, Çeki, post të cilin e mban deri në vitin 2002 kur emërohet konsull në ambasadën tonë në Austri, më pas ai emërohet ambasador i Shqipërisë në Austri. Tani Ibrahimi është ambasador i Shqipërisë në Gjermani.

Artur Kuko

Artur Kuko është një nga diplomatët më të shquar shqiptarë. Ai përfundoi studimet për Filozofi në Universitetin e Tiranës e më pas u specializua në fushën e marrëdhënieve ndërkombëtare. Pas mbarimit të studimeve, filloi punë në Institutin e Marrëdhënieve me Jashtë, duke ngjitur më pas shkallët e karrierës. Në vitin 1990 Artur Kuko është drejtor politik në Ministrinë e Punëve të Jashtme. Gjatë Lëvizjes së Dhjetorit Kuko është një nga diplomatët që u aktivizua në këtë lëvizje. Në pranverën e vitit 1992 emërohet ambasador i Shqipërisë në Bashkimin Evropian dhe NATO. Një detyrë të cilën e mban për më shumë vite. Në vitin 2005, Artur Kuko emërohet ambasador i Republikës së Shqipërisë pranë Mbretërisë së Belgjikës dhe BE-së. Ndërkohë në vitin 2007, sërish Presidenti i beson Artur Kukos detyrën e ambasadorit të Jashtëzakonshëm dhe Fuqiplotë të Republikës së Shqipërisë pranë NATO-s, detyrë të cilën vazhdon ta mbajë.

Behar Shtylla

Behar Shtylla është ndoshta diplomati i parë karriere i Shqipërisë të porsaçliruar. I diplomuar në Moskë, Behar Shtylla, një nga krerët e Partisë Komuniste në vitin 1950 emërohet ambasador në Francë, në të parin vend perëndimor me të cilin Shqipëria komuniste kishte marrëdhënie diplomatike. Në postin e ambasadorit në Francë Behar Shtylla zëvendësoi një tjetër personalitet të njohur të politikës shqiptare, Kahreman Yllin. Diplomati i njohur qëndroi në postin e ambasadorit Fuqiplotë në Francë deri në vitin 1952. Pas kësaj periudhe, në korrik të vitit 1953, ai emërohet në krye të diplomacisë shqiptare, duke zëvendësuar në këtë post vetë udhëheqësin komunist Enver Hoxha. Behar Shtylla qëndroi në krye të diplomacisë shqiptare për gati 17 vjet rresht, nga viti 1953 deri në vitin 1970, duke u bërë një nga ministrat e Jashtëm më jetëgjatë të shtetit shqiptar.

Gazmend Turdiu

Gazmend Turdiu është cilësuar si një nga diplomatët më të mirë shqiptarë të viteve ‘90. Diplomati i njohur ka punuar për disa vjet në diplomacinë shqiptare, deri në vitin 1996 kur ai emërohet ambasador i Shqipërisë në Zvicër. Gjatë kohës së tij si ambasador në Zvicër ai luan një rol të madh në njohjen e çështjes kosovare në arenën ndërkombëtare. Pas përfundimit të mandatit të tij si ambasador i Shqipërisë në Zvicër, ai punon në Ministrinë e Jashtme deri në vitin 2005. Pas kësaj periudhe ai emërohet ambasador Fuqiplotë i Shqipërisë në Gjermani, post të cilin Gazmend Turdiu e mbajti deri në vitin 2008. Në 2009 emërohet sekretar i përgjithshëm i ministrisë së Jashtme.

Jusuf Vrioni

Lindi më 16 mars 1916 në Korfuz, Greqi. Në vitin 1919 familja e tij kthehet në Shqipëri dhe më pas shkon në Francë, pasi i ati i tij, Iliazi, ishte diplomat. Ai mbaroi studimet në tre universitete. Me diplomën e Shkencave Politike, të Ekonomisë dhe të Jurisprudencës kthehet në Shqipëri dhe angazhohet në luftë si partizan. Arrestohet në 13 shtator të vitit 1947 nga regjimi komunist, për shkak të lidhjeve që kishte pasur familja e tij me Zogun dhe dënohet me 15 vjet burg. Lirohet më 3 dhjetor të vitit 1959 dhe më pas fillon të punojë si përkthyes i librave në frëngjisht. Në vitin 1980 emërohet në ambasadën tonë në Stokholm nga vetë Enver Hoxha, me detyrë për të redaktuar veprat e tij në frëngjisht. Në 14 korrik të vitit 1993, në Ditën Kombëtare të Francës, Jusufit i dorëzohet dekorata e lartë “Kavalieri i Letrave dhe i Artit”. Më pas nderohet me titullin e lartë francez “Oficer i Legjionit të Nderit”. Ndërkohë qyteti i Arles i dha titullin “Qytetar Nderi”. Në atë kohë emërohet edhe ambasador i Republikës së Shqipërisë pranë UNESCO-s në Francë. Vdiq në vitin 2001 në Francë.

Kujtim Xhani

Kujtim Xhani është ndoshta një nga diplomatët më të mirë shqiptarë për vendet e Azisë Lindore. I lindur më 29 gusht të vitit 1955 në Tiranë, Kujtim Xhani u diplomua në vitin 1979 në Fakultetin e Gjuhëve në Pyongyang, në Korenë e Veriut. Në vitin 1983 diplomati i njohur fillon punë në Ministrinë e Jashtme dhe më pas emërohet në ambasadën tonë në Korenë e Veriut dhe në vitin 1985 emërohet sekretar i kësaj ambasade, dhe në vitin 1995 emërohet Sekretar i Parë i ambasadës tonë në Kuala Lampur. Në vitin 2000 Kujtim Xhani emërohet ambasador i Shqipërisë në Republikën Popullore të Kinës. Kujtim Xhani e mbajti këtë post deri në vitin 2006. Në vitin 2011 ai emërohet sërish ambasador i Shqipërisë në Kinë.

Leontiev Çuçi

Leontiev Çuçi është një nga diplomatët më të njohur të Shqipërisë të fundit të viteve ‘90. I njohur ndryshe si një nga politikanët më të njohur si dhe një nga drejtuesit më të lartë të Partisë Socialiste, Leontiev Çuçi u fut në diplomacinë shqiptare në mes të viteve ‘90. Ish-deputeti i Partisë Socialiste si dhe një nga drejtuesit më të lartë të kësaj partie në vitin 1998, emërohet ambasador i Shqipërisë në Itali. Këtë post Leontiev Çuçi e mbajti për gati katër vite duke nisur nga viti 1998. Në vitin 2001 Leontiev Çuçi emërohet ambasador i Shqipërisë në Zvicër, post të cilin e mban deri në vitin 2005. Gjatë viteve të tij si ambasador i Shqipërisë në Itali dhe në Zvicër marrëdhëniet këtyre dy vendeve me vendin tonë u zhvilluan dhe forcuan shume më tej.

Pëllumb Xhufi

Pëllumb Xhufi lindi në Durrës në vitin 1951. Kreu studimet në universitetin e “La Sapienza” të Romës në fushën e gjuhëve klasike, të Historisë e Arkeologjisë, në vitet 1972-1977. Në vitin 1991-1992 zhvillon studime të thelluara në Universitetin e Këlnit (Gjermani) si bursist i fondacionit “Humboldt”. Fillimisht emërohet në Radio-Televizionin Shqiptar në Departamentin e Lajmeve të Jashtme, deri në vitin 1981 dhe më pas punon si kërkues shkencor në Institutin e Historisë të Akademisë së Shkencave deri në vitin 1992. Në vitin 1997 emërohet drejtor i Departamentit të Ballkanit në Ministrinë e Punëve të Jashtme e më pas zëvendësministër i Punëve të Jashtme. Në vitin 2001-2002 emërohet ambasador i Shqipërisë në Romë. Ka botime të shumta brenda dhe jashtë vendit në fushën e historisë së Shqipërisë dhe asaj ballkanike. Gjithashtu ka qenë pedagog në Fakultetin e Histori-Filologji dhe Gjuhët e Huaja

Roland Bimo

Roland Bimo është një diplomat karriere. Ai ishte ambasadori i parë shqiptar në Shtetet e Bashkuara, pas përmbysjes së regjimit komunist. Bimo e mbajti këtë post nga viti 1992 deri në vitin 1994. Ky ishte një post kyç i cili iu besua Bimos pas një periudhe 50-vjeçare ndërprerjeje të marrëdhënieve diplomatike me shtetin më të fuqishëm të botës, detyrë të cilën Bimo e kreu me shumë sukses. Përveçse në Shtetet e Bashkuara të Amerikës, ai ka qenë ambasador i Jashtëzakonshëm në Hungari gjatë viteve 1994-1997. Nga ky vit e deri në vitin 2002 Bimo është përfaqësuesi i Shqipërisë pranë OSBE-së dhe OKB-së si dhe organizatave të tjera ndërkombëtare me seli në Vjenë. Kthehet në Shqipëri në postin e Sekretarit të Përgjithshëm në Ministrinë e Jashtme. Më pas Bimo është dekretuar ambasador në Mbretërinë e Holandës, detyrë të cilën e kreu me sukses.

Shpresa Kureta

Shpresa Kureta është ndër të paktat gra që kanë arritur majat e diplomacisë shqiptare. Ajo është cilësuar si një nga diplomatet më të mira shqiptare të pas viteve ‘90. Në vitin 2002 Shpresa Kureta emërohet ambasadore Fuqiplotë e Shqipërisë në Austri me seli në Vjenë. Gjatë kësaj periudhe të punës së saj si ambasadore e vendit tonë në Austri marrëdhëniet midis dy vendeve patën një përmirësim të madh. Gjithashtu ambasadorja Shpresa Kureta bëri një punë të madhe në afrimin e kulturave të dy vendeve, ku në sajë të ambasadores tonë u bë e mundur që shumë artistë shqiptarë të ftoheshin dhe organizonin shfaqje në skenat e Austrisë. Shpresa Kureta qëndroi në postin e ambasadores së Shqipërisë deri në vitin 2005.

Kastriot Robo

Kastriot Robo është cilësuar si një nga diplomatët më të mirë karriere të periudhës së post komunizmit. Ai është vlerësuar si një diplomat i lartë. Në vitin 1998 ai emërohet ambasador i Shqipërisë në Greqi. Këtë post diplomati Kastriot Robo e mbajti për gati katër vjet, duke u dhënë marrëdhënieve midis dy vendeve një frymë tjetër bashkëpunimi nga ajo që kishin pasur deri në atë periudhë. Pas kësaj periudhe ai mban poste të rëndësishme në diplomacinë shqiptare. Në vitin 2006 diplomati Kastriot Robo emërohet ambasador i Shqipërisë në Londër, në një nga përfaqësitë diplomatike më të rëndësishme në botë. Aktualisht është ambasador i Shqipërisë në Spanjë.

Lublin Dilja

Lublin Dilja lindi në Elbasan. Studentët elbasanas e njohin diplomatin elbasanas për leksionet e Psikologjisë në universitetin “Aleksandër Xhuvani” dhe në Universitetin e Tiranës. Lidhja e tij me diplomacinë erdhi pasi deputeti i PD-së, u aktivizua në Partinë Demokratike, si sekretar për Marrëdhëniet me Jashtë, duke kontribuuar në krijimin e kontakteve të PD-së me forcat politike të djathta dhe organizmat ndërkombëtarë. Ka mbajtur postin e ambasadorit Fuqiplotë të Shqipërisë në Shtetet e Bashkuara të Amerikës nga viti 1994 deri në vitin 1997. Ai mori drejtimin e ambasadës pas Roland Bimos. Më pas u emërua si përfaqësues i Shqipërisë në OKB.

Fatos Tarifa

Fatos Tarifa hyri në shërbimin diplomatik shqiptar nga jeta akademike. Me një doktoratë në Shkencat Politike nga Universiteti i Tiranës, ai është i pari studiues shqiptar që ka fituar një PhD në Sociologji nga një universitet amerikan (Universiteti i Karolinës së Veriut). Dr. Tarifa ishte në SHBA kur u dekretua ambasador i Shqipërisë në Mbretërinë e Holandës gjatë viteve 1998-2001. Më pas Tarifa u akreditua ambasador i Shqipërisë në Shtetet e Bashkuara, ku shërbeu për katër vjet, prill 2001-maj 2005. Fatos Tarifa është autor i 20 librave dhe i mbi 40 artikujve shkencorë të botuar në revista akademike në SHBA dhe Evropë. Si diplomat ai është çmuar si një ndër ambasadorët më të suksesshëm të Shqipërisë në Uashington, i cili krijoi lidhjet më të ngushta me administratën dhe Kongresin Amerikan.

Zef MAZI

Zef Mazi është një nga diplomatët më të shquar shqiptarë që ka kapur majat dhe në organizatat ndërkombëtare. Fillimet e tij të para Mazi i ka si mësues i gjuhës angleze. Më pas punon si përkthyes e redaktor në shtëpinë botuese “8 Nëntori”. Në vitet 1987–1989 emërohet drejtor i Përgjithshëm i PTT-së, kryetar i Departamentit të Marrëdhënieve Ndërkombëtare. Dy vjet më pas drejton seksionin e CSCE-së, në departamentin e Ministrisë së Jashtme. Në vitin 1991-1992 është këshilltar ministri, i ngarkuar me punë i ambasadës shqiptare në Austri dhe Zvicër. Më pas emërohet ambasador, përfaqësues i Përhershëm i Shqipërisë në OSBE, OKB dhe organizata të tjera në Vjenë. Gjatë kësaj kohe është kryetar i misionit dhe koordinator kombëtar i iniciativës së Evropës Qendrore (CEI). Arrin detyrën e drejtorit në departamentin e OKB-së, MFA. Gjatë viteve 1998-2000 punon në sekretariatin e OSBE-së, e në dy vitet e mëpastajshme, në sekretariatin e Agjencisë Ndërkombëtare të Energjisë Bërthamore, Sektori i Evropës, Amerikës Latine dhe Azisë Perëndimore. Ka qenë kryetar i Forumit për Bashkëpunimin mbi Sigurinë në OSBE. Gjithashtu ka qenë ambasador, përfaqësues i Përhershëm i Shqipërisë pranë OSBE-së, Kombeve të Bashkuara dhe organizatave të tjera në Vjenë.

Anila Bitri

Lindi në Tiranë në vitin 1963. Kreu studimet në Universitetin e Tiranës për Histori dhe Gjuhë Spanjolle. Ka qenë pedagoge e Historisë së Mesjetës në Universitet dhe është doktoruar në Marrëdhëniet Shqiptaro-Spanjolle të Mesjetës në Universitetin e Tiranës dhe në Universitetin e Granadës në Spanjë. Në vitin 2002 shërben si konsulle e Nderit të Spanjës dhe në përfundim të mandatit dekorohet nga mbreti Huan Karlos për shërbimet ndaj shtetit spanjoll. Më pas punoi si ambasadore në Madrid. Në historinë e marrëdhënieve të Shqipërisë me Spanjën Bitri është ambasadorja më jetëgjatë. Gjatë mandatit të saj, marrëdhëniet mes dy vendeve kanë njohur një hov zhvillimi si në marrëdhëniet politike, ekonomike dhe kulturore. Në Spanjë Bitri është cilësuar si “Ambasadorja e huaj që flet më mirë spanjishten”.

Bashkim Zeneli

Bashkim Zeneli është një personalitet i futur në diplomaci pas një eksperience si gazetar e më pas si politikan. Bashkim Zeneli i përket brezit të gazetarëve që e ngritën nivelin e këtij profesioni në Shqipëri. Më pas Zeneli u zgjodh deputet i Partisë Socialiste për të kaluar në fushën e diplomacisë. Zeneli u emërua ambasador i Shqipërisë në Gjermani, në vitet 1998-2002. Më pas dekretohet ambasador në Greqi, në vitet 2002-2005. Zeneli cilësohet si një nga ambasadorët më të suksesshëm në shtetin helen, madje ka marrë edhe dekorata nga shteti grek. Ai u vlerësua nga Presidenti Moisiu në vitin 2006 me “Medaljen e Mirënjohjes” me motivacionin: “Për kryerjen me përkushtim të detyrës së ambasadorit të Republikës së Shqipërisë në Athinë, frymën konstruktive në trajtimin e marrëdhënieve shqiptaro-greke, për veprimtari të suksesshme në afirmimin e vlerave më të mira të komunitetit shqiptar në Greqi”.

Besnik Mustafaj

Lindi më 4 shtator të vitit 1958 në Bajram Curri. Kreu studimet në Universitetin e Tiranës në Fakultetin Histori-Filologji, dega Gjuhë-Letërsi Frënge, 1982. Filloi karrierën si pedagog i Letërsisë së Huaj në Universitetin e Tiranës e më pas si gazetar e përkthyes. Merr pjesë në themelimin e PD-së dhe është bashkëthemelues i Komitetit Shqiptar të Helsinkit. Në vitet 1992-1997 emërohet ambasador i Shqipërisë në Francë dhe i dërguar i Përhershëm i Republikës së Shqipërisë pranë UNESCO-s. Gjatë vitit 2001-2005 është nënkryetar i Komisionit të Jashtëm Parlamentar. Nga viti 2005 deri në vitin 2007 drejton Ministrinë e Punëve të Jashtme. Jep dorëheqjen si kryediplomat më 30 prill të 2007. Është autor i shumë librave me prozë, poezi dhe eseistikë.

Sokol Gjoka

Lindi më 27 korrik 1958 në Tiranë. Kreu studimet për gjuhën angleze dhe studime pasuniversitare për Shkenca Politike në Kolegjin e Birkback në Universitetin e Londrës. Fillesat në shërbimin diplomatik i pati si drejtor i Drejtorisë së Shtypit dhe Informacionit, si dhe zëdhënës i Ministrisë së Punëve të Jashtme të Shqipërisë. Gjatë viteve 1997-2002 është përfaqësues i Shqipërisë në CDMM të Këshillit të Evropës, përfaqësues i Shqipërisë në Komitetin e Medias dhe të Komunikimit në UNESCO, përfaqësues i Shqipërisë në Tryezën e Medias në Paktin e Stabilitetit, përfaqësues i Shqipërisë për Çështjet e Medias dhe Komunikimit në NEQ etj. Gjithashtu ka qenë edhe këshilltar dhe zëdhënës i Kryeministrit të Shqipërisë. Ndërsa mandatin 2003–2007 e kryen si ambasador i Jashtëzakonshëm dhe Fuqiplotë i Republikës së Shqipërisë në Republikën e Polonisë, të Estonisë, të Letonisë, të Lituanisë dhe në Ukrainë. Është dekoruar nga Presidenti i Republikës së Polonisë me “Urdhrin e Meritës të Kryqit të Komandantit të Republikës së Polonisë” dhe nga Presidenti i Republikës së Shqipërisë me “Medaljen e Mirënjohjes”. Tani është ambasador i Shqipërisë në Rusi.

Petrit Bushati

Lindi në Tiranë më 20 tetor të vitit 1948. Diplomohet për Gjuhë Shqipe e Angleze në Fakultetin e Histori-Filologjisë dhe pas një eksperience pune si mësues e gazetar, i futet karrierës diplomatike në dhjetor të vitit 1983, kur emërohet Sekretar I në ambasadën shqiptare në Austri, i ngarkuar për shtypin dhe organizatat ndërkombëtare. Në vitin 1988 deri në nëntor të vitit 1991, emërohet ambasador i Shqipërisë në Suedi, Danimarkë, Norvegji, Finlandë dhe Islandë. Kthehet pranë dikasterit, i emëruar si drejtor i Drejtorisë së Marrëdhënieve Shumëpalëshe, OKB-së dhe i Organizatave Ndërkombëtare dhe deri në vitin 1997 kryen detyra të rëndësishme pranë këtij dikasteri, në Universitetin e Tiranës, Shoqatës e Bashkëpunimit Teknik të Gjermanisë etj. Më pas caktohet ambasador i Shqipërisë në SHBA, Meksikë, Kanada, Serbi dhe Mali i Zi. Bushati është diplomat karriere i suksesshëm. Gjatë viteve që ka punuar si diplomat dhe ambasador është angazhuar në transformimet demokratike të politikës së jashtme të Shqipërisë si dhe ka dhënë kontributin për zhvillimin e marrëdhënieve dypalëshe në vendet ku është emëruar.

Publikuar: 16.05.2013 | 12:46
Lexuar: 2152 herë
Printo PDF format Shto në,..

Komentet
Tonuzi (24/05/2016 16:08:52) ...Keni harruar shume emra profesionistesh ne politiken nderkombetare dhe keni vene disa "politikan" qe jane emeruar ga politika. Shkrimi eshte shume i goditur. Reduktoni ndonje emer (te emruar) dhe vini ata qe nuk dilnin shume neper gazeta...pormbajten politiken shqiptare ne vite teper te veshtira !

Ndalohet përdorimi i gjuhës denigruese dhe fjalëve ofenduese ndaj individëve dhe ndaj grupeve specifike, si dhe komentimet që s`kanë të bëjnë me temën e artikullit. Moderatorët mbajnë të drejtën e fshirjes së komenteve që thyejnë rregullat e komunikimit.
Emri:
Email adresa:
Komenti:















Developed by: Just5 Studio
Rss furnizime