Virusi i gripit të ri i llojit A (H1N1) ende po përhapet në Afrikën Veriore dhe në disa pjesë të Evropës Lindore dhe Juglindore dhe në Azi, por në përgjithësi, intensiteti i sëmundjes është në rënie, kumtoi mbrëmë Organizata Botërore e Shëndetësisë (OBSH).

Siç informoi zëdhënësi i OBSH-së, Gregori Harti, në korniza globale, H1N1 edhe më tej mbetet virus dominant i gripit dhe ai ende është i rrezikshëm për shtatzënat dhe për të sëmurët kronikë.

"Megjithatë, aktiviteti i virusit dhe përhapja e gripit të ri është në rënie", tha Harti.

Në raportin e rregullt javor të OBSH-së, theksohet se vala kryesore e përhapjes së gripit A në hemisferën veriore të Tokës ka kaluar në tetor dhe nëntor, por se virusi akoma është aktiv në "Afrikën veriore, Egjipt, disa pjesë të Evropës Lindore dhe Juglindore dhe në disa rajone të Azisë Jugore dhe Lindore, duke e përfshirë edhe Indinë Perëndimore".

Nga pasojat e infektimit me virusin H1N1, nga prilli i vitit të kaluar, e deri më tani, në mbarë botën jetën e kanë humbur së paku 14.700 persona, thuhet në raportin e OBSH-së, me ç'rast theksohet se numri i saktë i viktimave do të bëhet i ditur madje një apo dy vite pas përfundimit të pandemisë.