Vepra e humbur e artistit venecian Titian, në vlerë prej rreth 4 milion sterlina, është shitur gabimisht nga shtëpia e ankandeve “Christie’s” për vetëm 8 000 sterlina, u zbulua të mërkurën.

Vepra “Saloma me kokën e Xhon Baptistit” nga shekulli XVI është gjetur në vitin 1993, nga vëllai dhe motra David Dickson dhe Suzan Pristley derisa po rregullonin shtëpinë e tyre në Londrën jugore.

Ata menduan se pastrimi i pikturës do të ishte shpenzim i panevojshëm, prandaj e dërguan për vlerësim në “Christie’s”, ku iu tha se nuk është vepër e piktorit të njohur Titian, por si duket bëhet fjalë për ndonjë pjesëtar të shkollës së tij.

Një vit më vonë, piktura u shit për 8 000 sterlina. Vetëm kur piktura u shit përsëri në vitin 2001, u zbulua vlera e saj reale, kur u ble nga një koleksionist nga Milano. /koha/