Tërmeti është ndjerë edhe në Shkup. Informacioni për tërmetin dhe epiqendrën e tij, është dhënë edhe nga Qendra Sizmiologjike Europiano-Mesdhetare në shërbimin e Internetit. Lëkundjet e tokës, me epiqendër në territorin e Kosovës, i konfirmoi edhe Enti i sizmiologjisë në Maqedoni.
Në disa qytete të Kosovës janë ndier dridhje të fuqishme të tokës. Deri më tash nuk raportohet për dëme dhe viktima. Ende nuk është raportuar zyrtarisht për shkallën e dridhjeve dhe epiqendrën e këtij tërmeti. Menjëherë pas këtyre dridhjeve ka rënë rrjeti i telefonisë mobile.
Sipas Institutit Seizmologjik të Kosovës, tërmeti ka goditur Kosovën në orën 14:38 minuta. Sizmografët e Rrjetit Sizmologjik të Kosovës raportojnë se Magnituda e tërmetit ishte M=5.2 shkallë të Rihterit, ndërsa intensiteti në epiqendër VII ballë sipas MCS-64 thellësia 5.2 km.
Tërmeti është ndjerë edhe në Shkup. Informacioni për tërmetin dhe epiqendrën e tij, është dhënë edhe nga Qendra Sizmiologjike Europiano-Mesdhetare në shërbimin e Internetit. Lëkundjet e tokës, me epiqendër në territorin e Kosovës, i konfirmoi edhe Enti i sizmiologjisë në Maqedoni. "Tërmet me intensitet prej katër deri pesë shkallë sipas Shkallës makroseizmike evropiane - 1998, është ndier sot pasdite në orën 14 e 38 minuta në pjesën veriore të Republikës së Maqedonisë.
Observatori seizmologjik pranë Fakultetit matematikor-natyror, informon se epiqendra e tërmetit ka qenë 120 kilometra në veriperëndim të Shkupit, ndërsa fuqia e tij në vatër ka qenë 4,8 ballë sipas Shkallës së Rihterit", thuhet në kumtesën e Entit Sizmiologjik në Maqedoni
Punonjësit e institucioneve në Prishtinë kanë braktisur për disa minuta vendet e punës dhe kanë dalë në Sheshin Nënë Tereza, të frikësuar për mundësinë e përsëritjes së mundshme të tërmetit.
Drejtori i Drejtorisë për Mbrojtje dhe Shpëtim, Ylber Durmishi, tha se ende nuk ka të dhëna për dëmet e mundshme.
Sipas tij, si pasojë e tërmetit nxënësit e shkollave si dhe banorët e pallateve të larta kanë qëndruar për një kohe jashtë.
Nuk do të ketë tërmet me pasoja katastrofike
Në Kosovë nuk do të ketë termet me pasoja katastrofike i ka thënë Radio Dukagjinit, Slavica Radovanovic, drejtoreshë e Institutit Sizmologjik të Republikës së Serbisë e cila ditë më parë kishte paralajmëruar se në Rrafshin e Dukagjinit po akumulohet energji sizmike.
Paralajmërimet që ka bërë Instituti Sizmologjik i Republikës së Serbisë për akumulim të energjisë sizmike sipas drejtoreshës së këtij Instituti, Slavica Radovanovic mbështeten në kërkimet që janë kryer brenda disa viteve. Sipas saj këto paralajmërime janë hiperbolizuar nga mediat. Radovanovic heq dilemat se në Rrafshin e Dukagjinit nuk mund të ndodhin tërmete katastrofike.
Do të thotë nuk duhet tepruar, nuk parashihet ndonjë katastrofë si po i shohim tash nëpër vise të botës, asgjë të tillë nuk parashohim, do të thotë se në Dukagjin nuk mund të ndodhin tërmete me pasoja katastrofike.
Slavica Radovanovic, drejtoreshë e Institutit Sizmologjik të Republikës së Serbisë përmend tërmetin e vitit 1962 në Pejë i cili pati rrënuar një minare. Bazuar në këtë, tërmeti i atëhershëm ishte dhjetë herë më i fuqishëm sesa ai që ndodhi sot në rajonin e Pejës dhe afërsi të Istogut thotë ajo.
Zonja Radovanovic thotë se matjet do të vazhdojnë dhe më vonë mund të konkludohet nëse tërmeti që ndodhi sot ishte ai kryesori për të cilin Instituti që ajo drejton kishte paralajmëruar.
Bazuar në matjet që do ti bëjmë në vazhdim do të mund ta parashikojmë se a ishte ky tërmeti kryesor që është pritur apo mund të ketë edhe një tërmet diç më i fuqishëm, ka deklaruar ajo.
Sipas rrjetit sizmologjik të Kosovës tërmeti me epiqendër gjashtë kilometra në juglindje të Istogut ishte me magnitudë 5.2 shkallë të Rihterit.
