Partitë parlamentare të shqiptarëve sot vazhduan me kundërshtimin e qëndrimeve lidhur me propozimin e DR-së për ndryshime të Ligjit për Komitetin për marrëdhënie ndërmjet bashkësive.

Flora Kadriu nga DR-ja akuzoi se BDI-së nuk i përgjigjet zhbllokimi i Komitetit për marrëdhënie ndërmjet bashkësive.

"Demokracia e Re është e vetëdijshme se përse partia më e madhe maqedonase nuk dëshiron të debatojë në Kuvend për projektin 'Shkupi 2014', për vendimin për mësimin e gjuhës maqedonase nga klasa e parë për fillestarët shqiptarë, për mosdhënien e pasaportave dygjuhësorë, për ndryshimin e shtetësisë nga "i Republikës së Maqedonisë" në "maqedonase", por nuk mund të kuptojë përse BDI, parti e cila thirret në votat dhe legjitimimitetin e shqiptarëve, nuk është e interesuar ta pranojë iniciativën e DR-së për zhbllokim të Komitetit", tha Kadriu.

"E pyesim BDI-në, përse nuk e pranoi iniciativën e Demokracisë së Re që të pakësohet numri për kuorum të Komitetit prej 13 në 10 anëtarë, duke e ditur se sipas Marrëveshjes kornizë të Ohrit dhe amandamentit kushtetues XII është paraparë që vendimet të sillen me shumicë të thjeshtë nga numri i përgjithshëm i anëtarëve të Komitetit?", tha Kadriu.

Xhevat Ademi nga BDI, ndërkaq, u përgjigj se kuorumi që e propozon Demokracia e Re i përgjigjet VMRO-DPMNE-së sepse nga 19 anëtarë të Komitetit, dhjetë janë nga lista e deputetëve të VMRO-DPMNE-së. "Tani nuk e kam të qartë kush i propozon këto ndryshime. Demokracia e Re?!", tha ai.

Deputeti i BDI-së dhe kryetar i Komitetit përsëriti se sipas tij, problemi nuk është në kuorumin, por në qasjen. "I lus kolegët nga DR-ja që të mos merren me gjëra të parëndësishme, për arsye se nuk janë në pyetje numrat, por qasja. Kuorumi që e propozojnë ata është në kundërshtim me interesat e shqiptarëve", tha Ademi.

Ademi paralajmëroi se do të takohet me euroambasadorin Ervan Fuere, ambasadorin amerikan, Filip Riker dhe me përfaqësuesin e OSBE-së, Hoze Luiz Herero dhe se në mbledhjen e ardhshme të Komitetit, përveç tyre, do ta ftojë të marrë pjesë edhe kryeministrin Nikolla Gruevski.

Komiteti për marrëdhënie ndërmjet bashkësive nuk mbajti katër mbledhje për shkak të mungesës së kuorumit.