Nënkryetari i parlamentit të Maqedonisë, Rafiz Aliti të mërkurën ka pritur një delegacion nga Shqipëria i udhëhequr nga Valter Shtylla, drejtor i institutit të monumenteve të Shqipërisë.

Në kuadër të vizitës njëditëshe, e cila ishte bërë me ftesë te drejtorit të qendrës për konservim, Behixhudin Shehapi është biseduar për bashkëpunimin e mëtutjeshëm bilateral, mundësinë e kontributit të shkencëtarëve nga Shqipëria si dhe pjesëmarrje për shënimin në mënyrë sa më dinjitoze të 100 vjetorit të lindjes së Nënës Terezë.

Shehapi ka theksuar për “Lajm” se ekziston një bashkëpunim i shkëlqyer me kolegët nga Shqipëria. “Kemi biseduar edhe për forma të tjera të bashkëpunimit si me muzeun e Etnologjisë por edhe me Institutin e monumenteve të Shqipërisë.

Në gjurmimet arkeologjike që do t’i bëjmë në Ladorishtë të Strugës, Gradec të Gostivarit dhe Balltepe e Tetovës, pjesëmarrës gjatë kryerjes së punimeve do të jen edhe ekspert nga Shqipëria”, tha Shehapi. Gjithashtu, vetë drejtori Valter Shtyllaqë do të marrë pjesë në rinovimin e Urës së Zhelinës në Tetovë.

Në takim ka marrë pjesë edhe Anton Sereçi, si anëtar i Këshillit të Parlamentit të Maqedonisë për shënimin e ditëlindjes së Nënës Terezë, ndërsa mysafirët nga Shqipëria i ka pritur edhe kryetari i BDI-së, Ali Ahmeti.