- Kombëtarja merr një bonus prej 54 pikësh pas fitores 1-0 me Irlandën e Veriut -

Gjergji Mima

- Shqipëria u ngjit me 13 vende në renditjen botërore mujore të FIFA-s, të publikuar sot në faqen zyrtare (fifa.com), duke u pozicionuar tani në vendin e 83-të nga vendi i 96-të që ishte në klasifikimin paraardhës.

Bonusi i marrë për fitoren 1-0 në "Qemal Stafa" ndaj Irlandës së Veriut në 3 mars, ka sjellë +54 pikë për Kombëtaren, e drejtuar nga kroati Josip Kuzhe, duke pasur tani 389 pikë në total.

Në renditjen specifike të UEFA-s, Shqipëria ndodhet në vendin e 40-të midis 53 ekipeve kombëtare që aderojnë në konfederatën kontinentale, ndërkohë që një muaj më parë Kombëtarja shqiptare renditej në vendin e 41-të.

Përsa u përket kundërshtarëve të Kombëtares shqiptare në grupin D për eliminatoret e Kampionatit Europian, Franca ndodhet në Top-10 më të mirat e botës, por duke zbritur një vend, tani është e 8-ta në FIFA dhe e 7-ta në UEFA.

Rumania, kundërshtari ynë i parë zyrtar, ndodhet në vendin e 32-të, duke ngjitur 4 vende në FIFA, dhe është e 18-ta në UEFA. Bosnja gjendet në vendin e 47-të, duke ngjitur 2 vende në FIFA, dhe është e 27-ta në UEFA. Bjellorusia gjendet në vendin e 80-të, duke zbritur 1 vend në FIFA, ndërsa është e 39-ta në UEFA. Ndërsa Luksemburgu gjendet në vendin e 124-të, duke ngjitur 2 vende në FIFA, dhe është i 47-ti në UEFA