“Pritja” titullohet mozaiku i piktorit gjakovar, Alban Meka, që ka zënë vend në shoqatën “Thirrjet e nënave”.

Ishin themelueset e kësaj shoqate nënat kosovare që presin djemtë dhe burrat e tyre të zhdukur gjatë luftës së fundit në Kosovë ato që e kishin inspiruar Mekën të niste bashkimin e gurëve të përmasave të vogla. Dy portretet që karakterizojnë mozaikun “Pritja”, sipas Mekës, janë në “pritje të vazhdueshme për të ditur më shumë për fatin e bijve dhe burrave të tyre”.

“Këtë mozaik e kam punuar para tre vjetëve. Inspirimi ka ardhur pikërisht nga pritja e nënave kosovare. Mua më kanë prekur shumë këto ngjarje. E kam menduar se pjesë e këtyre grave ka mundur të jetë edhe nëna ime”, ka thënë Meka.

Kryetarja e shoqatës “Thirrjet e nënave”, Nysrete Kumnova, ka falënderuar Mekën për dhuratën.

“Ne po mendojmë që ky mozaik të vendoset në Varrezat e Martirëve në Kodrën e Çabratit. Këtë do ta bëjmë më 27 prill, kur edhe shënohet Dita e të zhdukurve të Kosovës”, ka thënë Kumnova./koha/