Liderët partiak në takimin njëorësh i cili përfundoi sot pas mesditës në Klubin e deputetëve në Shkup, i kanë dhënë propozimet e tyre për ndryshimin e Kushtetutës, por nuk kanë këmbyer mendime për to. Qëndrimet do t'i harmonizojnë grupet punuese të ekspertëve dhe nëse arrihet pajtim, deri në fund të muajit do të mbahet takim i ri i liderëve.

Kryetari i BDI-së Ali Ahmeti pas takimit deklaroi se kërkesat e tyre për ndryshime kushtetuese i kanë dorëzuar në formë të shkruar, duke mos precizuar për çka bëhet fjalë. Theksoi se nuk kanë biseduar për qëndrimet rreth kërkesave por vetëm se i kanë prezantuar.

Në takimin të cilin e konvokoi kryeministri dhe lider i VMRO-DPMNE-së, Nikolla Gruevski që të shqyrtohen ndryshimet e Kushtetutës, në pjesën e Këshillit gjyqësor, qëllimi i së cilit është të përforcohet pavarësia e sistemit gjyqësor dhe të rritet efikasiteti i tij, pëprveç Ahmetit morën pjesë edhe kryetarët e LSDM-së Branko Cërvenkovski dhe i Demokracisë së Re, Imer Selmani. Si edhe në disa takime të fundit të liderëve, edhe kësaj radhe nuk erdhi njeriu i parë i PDSH-së, Menduh Thaçi.

Propozimi për ndryshimet kushtetuese në pjesën e Këshillit gjyqësor përmban disa punë kyçe - të rritet numri i anëtarëve të Këshillit të zgjedhur nga radha e gjykatësve me votim të fshehtë në llogari të atyre që i propozojnë Kuvendi dhe presidenti i shtetit, ministri i Drejtësisë të mos jetë anëtar i Këshillit dhe shkurtimi i mandatit të anëtarëve i cili tani është gjashtë vjet.

DR-se pas perfundimit te takimit me nje kumtese ka njoftuar se ka propozuar që nga 15 anëtarët e Këshillit Republikan Gjyqësor, 9 të jenë nga rradhët e gjyqtarëve, nga të cilët 3 duhet t’i takojnë bashkësive etnike joshumicë, ndërsa 6 të propozohen nga Kuvendi, nga të cilët 2 duhet të pjesë pjesëtarë të bashkësive etnike joshumicë.

LSDM, BDI dhe Demokracia e Re, paralajmëruan se në takimin e sotëm do të kërkojnë edhe ndryshime të tjera në Kushtetutë, jashtë atyre të cilat i ka propozuar VMRO-DPMNE. LSDM-ja propozoi plotësimin e nenit 52 të Kushtetutës me të cilin do të mundësohet vjetërsia e veprave penale që kanë të bëjnë me transfromimin e kapitalit shtetëror dhe shoqëror, BDI në Gjykatën Kushtetuese të vendoset me shumicën e ashtuquajtur të Badenterit, Demokracia e Re do të kërkojë që sipas parimit të Badenterit të vendoset, përveç se në Gjykatën Kushtetuese dhe në Këshillin gjyqësor gjatë zgjedhjes së gjykatësve, por edhe gjatë miratimit të buxhetit të shtetit.