Judy S. Richardson, profesoreshë emeritus nga SHBA, të premten, më 09.04.2010, qëndroi për vizitë pune në USHT. Në fillim, prof Judy S. Richardson u prit nga Shefi i Programit studimor të Gjuhës dhe Letërsisë Angleze, mr. sc Arburim Iseni, i cili mysafires i uroi mirëseardhje në USHT duke e çmuar lartë kontributin që ajo ka dhënë për Katedrën e gjuhës angleze.

Profesoresha Judy S. Richardson tha se ndjehet e nderuar dhe e afërt me stafin e kësaj katedre dhe me kënaqësi ka pranuar të mbajë një ligjëratë për studentët e Universitetit tonë. Vlen të përmendet se profesoresha Judy S. Richardson, në emër të asociacionit ,,College Reading Association”, me seli në UTAH të SHBA-ve, revistës me karakter ndërkombëtar dhe interuniversitar ,,SUT SCIENTIFIC OBSERVER”, e cila botohet nga Katedra e gjuhës angleze, i dhuroi dekoratë për cilësi dhe afirmimin e kulturave të ndryshme mes popujve. Mr. sc. Arburim Iseni, në emër të stafit drejtues të kësaj Katedre dhe studentëve i shprehu falënderime profesoreshës amerikane, duke shtuar se kjo dekoratë e inkurajon edhe më shumë redaksinë e revistës për ta vazhduar punën akademike dhe shkencore, por me këtë nderohet edhe Universiteti ynë , theksoi Arburim Iseni.

Më pas, profesoresha Judy S. Richardson, para studentëve dhe stafit akademik të Katedrës së Gjuhës dhe Letërsisë Angleze mbajti një ligjëratë në gjuhën angleze, nga lënda e Metodikës së mësimdhënies dhe mësimnxënies.

Në ligjëratën e saj, para auditorit i përmendi strategjitë dhe teknikat që përdoren në këtë proces mësimor. Profesorët dhe studentët e USHT-së e përcollën me interes këtë aktivitet me rëndësi, i cili sjell përvojën perëndimore në fushën e studimit dhe kërkimit shkencor.